ກອງປະຊຸມການລົງທຶນອາຊຽນເນັ້ນໃຫ້ເຫັນໂອກາດການເຕີບໂຕ

ກອງປະຊຸມການລົງທຶນອາຊຽນ 2024 ໄດ້ເນັ້ນໃຫ້ເຫັນວ່າພາກພື້ນນີ້ເປັນຈຸດໝາຍປາຍທາງການລົງທຶນຊັ້ນນຳ ພ້ອມທັງສົ່ງເສີມການເຕີບໂຕແບບຍືນຍົງ ແລະ ຄອບຄຸມຜ່ານໂອກາດການລົງທຶນທາງຍຸດທະສາດ.

ເຈົ້າໜ້າທີ່ລາວ ແລະ ຈາກປະເທດອາຊຽນອື່ນໆ ໄດ້ມາເຕົ້າໂຮມກັນສຳລັບກອງປະຊຸມການລົງທຶນອາຊຽນ 2024 ຢູ່ນະຄອນຫຼວງວຽງຈັນ ໃນວັນຈັນ.
ກອງປະຊຸມດັ່ງກ່າວໄດ້ຈັດຂຶ້ນຢູ່ນະຄອນຫຼວງວຽງຈັນ ໃນວັນຈັນ, ຈັດໂດຍກະຊວງແຜນການ ແລະ ການລົງທຶນຂອງລາວ, ສະພາທີ່ປຶກສາທຸລະກິດອາຊຽນ, ສຳນັກງານເລຂາທິການອາຊຽນ ແລະ ຄະນະກຳມາທິການເສດຖະກິດ ແລະ ສັງຄົມແຫ່ງສະຫະປະຊາຊາດສຳລັບອາຊີ ແລະ ປາຊີຟິກ (ESCAP).

ໃນຄຳກ່າວເປີດງານ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ ໄດ້ເນັ້ນໜັກເຖິງຄວາມທົນທານ ແລະ ຄວາມສາມາດປັບຕົວຂອງອາຊຽນ ທ່າມກາງສິ່ງທ້າທາຍຂອງໂລກ, ພ້ອມທັງຍ້ອງຍໍພາກພື້ນທີ່ໄດ້ກາຍເປັນຈຸດໝາຍປາຍທາງການລົງທຶນລະດັບໂລກ ຜ່ານວິໄສທັດຮ່ວມກັນເພື່ອການພັດທະນາແບບຍືນຍົງ.
ເພິ່ນໄດ້ເນັ້ນໃຫ້ເຫັນແຜນປະຕິບັດການດ້ານການລົງທຶນພາກພື້ນຂອງອາຊຽນ ວ່າເປັນໂຄງການສຳຄັນທີ່ມີເປົ້າໝາຍສົ່ງເສີມອາຊຽນໃຫ້ເປັນຈຸດໝາຍປາຍທາງການລົງທຶນແບບເອກະພາບ. ນອກນັ້ນ ເພິ່ນຍັງເນັ້ນໜັກເຖິງຄວາມສຳຄັນຂອງການລົງທຶນໂດຍກົງຈາກຕ່າງປະເທດ ໃນການຂັບເຄື່ອນເປົ້າໝາຍການພັດທະນາຊາດຂອງລາວ ໂດຍສະເພາະໃນຂະແໜງພະລັງງານທົດແທນ, ພື້ນຖານໂຄງລ່າງ ແລະ ການປ່ຽນແປງທາງດິຈິຕອນ.

ນອກຈາກນັ້ນ, ທ່ານສະເຫຼີມໄຊ ໄດ້ເນັ້ນເຖິງຄວາມມຸ່ງໝັ້ນຂອງລັດຖະບານລາວ ໃນການສົ່ງເສີມສະພາບແວດລ້ອມການລົງທຶນທີ່ເອື້ອອຳນວຍ ຜ່ານການປະຕິຮູບທີ່ມຸ່ງເພີ່ມຄວາມໂປ່ງໃສ ແລະ ຫຼຸດຜ່ອນຂັ້ນຕອນທຸລະກິດ, ໂດຍລະບຸວ່າລາວໄດ້ຮັບການລົງທຶນຈາກຕ່າງປະເທດຢ່າງຫຼວງຫຼາຍໃນໂຄງການໄຟຟ້ານ້ຳຕົກ, ພະລັງງານແສງອາທິດ ແລະ ພະລັງງານລົມ ຊຶ່ງປະກອບສ່ວນຕໍ່ເປົ້າໝາຍພະລັງງານສະອາດຂອງພາກພື້ນ.

ດ້ວຍລາວເປັນປະທານອາຊຽນໃນປີນີ້ ພາຍໃຕ້ຫົວຂໍ້ຫຼັກ "ການລົງທຶນເພື່ອເສີມສ້າງການເຊື່ອມໂຍງ ແລະ ຄວາມທົນທານ", ກອງປະຊຸມນີ້ມີບົດບາດສຳຄັນໃນການຂັບເຄື່ອນເປົ້າໝາຍການເຊື່ອມໂຍງເສດຖະກິດຂອງອາຊຽນ.
ງານດັ່ງກ່າວໄດ້ນຳສະເໜີໂອກາດການລົງທຶນທີ່ສອດຄ່ອງກັບວິໄສທັດຂອງອາຊຽນ ໃນການເສີມສ້າງສາຍພົວພັນທາງເສດຖະກິດໃຫ້ເຂັ້ມແຂງຂຶ້ນ, ສົ່ງເສີມການພັດທະນາແບບຍືນຍົງ ແລະ ເລັ່ງການປ່ຽນແປງທາງດິຈິຕອນ ເພື່ອຮັບປະກັນພາກພື້ນທີ່ທົນທານ ແລະ ເຊື່ອມໂຍງກັນຫຼາຍຂຶ້ນ.

ໜຶ່ງໃນຈຸດເດັ່ນຂອງກອງປະຊຸມແມ່ນການເປີດຕົວແຜນປະຕິບັດການດ້ານການລົງທຶນພາກພື້ນຂອງອາຊຽນ ສຳລັບປີ 2025-2030 ຊຶ່ງກຳນົດແຜນທີ່ນຳທາງທີ່ຈະຖືກນຳສະເໜີເພື່ອຊີ້ນຳຄວາມພະຍາຍາມຂອງອາຊຽນ ໃນການດຶງດູດການລົງທຶນ, ສົ່ງເສີມການພັດທະນາແບບຍືນຍົງ ແລະ ວາງຕຳແໜ່ງອາຊຽນໃຫ້ເປັນຈຸດໝາຍປາຍທາງການລົງທຶນດຽວ ພາຍໃຕ້ສັນຍາການລົງທຶນແບບຄອບຄຸມຂອງອາຊຽນ ແລະ ແຜນວາງໂຄງປະຊາຄົມເສດຖະກິດອາຊຽນ 2025.

ໃນລະຫວ່າງກອງປະຊຸມ, ຜູ້ເຂົ້າຮ່ວມໄດ້ປຶກສາຫາລືກ່ຽວກັບທ່າອ່ຽງ, ໂອກາດ ແລະ ສິ່ງທ້າທາຍລ້າສຸດດ້ານການລົງທຶນໃນປະເທດອາຊຽນ. ຫົວຂໍ້ລວມມີການປະຕິບັດການລົງທຶນແບບຍືນຍົງ ແລະ ມີຄວາມຮັບຜິດຊອບ, ການພັດທະນາພື້ນຖານໂຄງລ່າງ, ການປ່ຽນແປງທາງດິຈິຕອນ, ການລົງທຶນເສດຖະກິດສີຂຽວ ແລະ ການຮ່ວມມືຂ້າມຊາຍແດນ.

ກ່ອນກອງປະຊຸມ, ຄະນະຜູ້ແທນໄດ້ໄປຢ້ຽມຢາມເຂດເສດຖະກິດພິເສດ 3 ແຫ່ງໃນນະຄອນຫຼວງວຽງຈັນ ໄດ້ແກ່ ເຂດເສດຖະກິດພິເສດທະເລສາບທາດຫຼວງ, ທ່າບົກທ່າໆນາແລ້ງ ແລະ ເຂດເສດຖະກິດພິເສດໄຊເສດຖາ ຊຶ່ງສະແດງໃຫ້ເຫັນຄວາມພ້ອມຂອງພື້ນຖານໂຄງລ່າງຂອງລາວ ໃນການຮອງຮັບການພັດທະນາອຸດສາຫະກຳການຜະລິດ ແລະ ເສີມສ້າງສາຍພົວພັນທາງເສດຖະກິດໃນທົ່ວພາກພື້ນ.
ກອງປະຊຸມນີ້ມີລັດຖະມົນຕີ, ຜູ້ກຳນົດນະໂຍບາຍ ແລະ ຜູ້ນຳທຸລະກິດຈາກລາວ ແລະ ປະເທດອາຊຽນອື່ນໆເຂົ້າຮ່ວມ.